Erronka
Erronkaren izenburua hau da: Nola lor daiteke Bizkaiko Foru Aldundiaren webguneetan argitaratutako informazioa herritar guztientzat argia, ulerterraza eta beren beharretara egokitua dela hautematea?
Testingurua
Bizkaia.eus Bizkaiko Foru Aldundiaren informaziora iristeko kanal digital nagusia da. Horrez gain, BFA/DFB-ren beste webgune batzuk ere badaude, zerbitzu edo gai espezifikoei lotuak. Gaur egungo plataforma ezberdinetako edukietan, ordea, ulermena eta irisgarritasuna zailtzen duten hainbat erronka atzeman dira: edukia, sailen arabera, irizpide ezberdinak kontuan hartuta argitaratzen da (nahiz eta estilo bateratu baten alde lanean ari den), hizkera, askotan oso teknikoa da, eta formatuak ez daude beti ulermena errazteko moduan landuta. Horrek guztiak zaildu egiten du herritarrek informazioa modu autonomoan ulertzea.
Badira hizkera argia sustatzeko barne‑prestakuntzak eta horren aplikazioa zaintzen duen sail bat ere. Sail horrek idazkera‑jarraibideak ematen ditu, informazioa edonork uler dezan errazteko helburuz, baina ez dago argitaratzen den edo jada argitaratua dagoen edukiaren berrikuspenaren ardurapean.
Egindako elkarrizketek agerian utzi dute oztopo nagusia hizkera argi eta irisgarriaren falta dagoela. Edukiaren zati handi bat PDF formatuan argitaratzen da, teknizismoz eta egitura konplexuz beteta. Gainera, esperientzia digitala ez dago erabat optimizatuta mugikorretarako, herritarren artean gehien erabiltzen den kanala izan arren.
Diseinu egokiago baterantz egiten ari bagara ere, edukien pilaketa handiak, zenbaitetan, egitura argi‑gabeak sortzen ditu, eta erabiltzaileak informazioa aurkitzeko scroll luzeak egin behar ditu. Gainera, webguneak ez du pertsonalizazio‑aukerarik eskaintzen adinekoentzat edo premia bereziak dituzten pertsonentzat, eta ez dago edukia argitaratu aurretik haren argitasuna eta irisgarritasuna egiaztatzen duen sistemarik.
BFA/DFB-ren webguneen unibertsoa irtenbide atseginago eta gardenago batean bihurtzeak, informazioa argia, ulerterraza eta behar anitzetara egokitua dela bermatzea esan nahi du. Horretarako, ikuspegi integrala behar da: hizkera sinplifikatzea, hizkera ez‑sexistaren irizpideak txertatzea, eta irisgarritasun kognitibo, bisual eta linguistikorako jarraibideak aplikatzea. Alegia, webgune inklusiboagoa eraikitzea. Era berean, funtsezkoa da irizpide bateratuak, balioztatze‑tresnak eta prozesuak ezartzea, bi hizkuntzetan koherentzia terminologikoa bermatzeko.
Erronka honen baitan, filosofia honek jada argitaratutako edukira ere aplikatzeko aukera bilatzen du, herritarrei webgune inklusiboagoa eskaintzeko informazioa eskuratu nahi duten momentuan.
Erronkaren deskribapena (PDF)
Bideoa Infoday
Aurkezpena Infoday
FAQS Infoday